【Emily】談捐器官、兩蚊車爭議 羅健熙：政府唔係靠惡就得

【明報專訊】特首李家超噚日話非常反對任何嘗試破壞器官捐贈呢個崇高嘅理念，又提到取消器官捐贈數字唔尋常，當中超過一半係冇登記過而取消，又話要求警方調查。民主黨主席羅健熙噚日就拍YouTube，做吓時事評論員，話有市民唔清楚器官捐贈嘅機制係可以理解，亦都有市民未必記得自己有冇登記，政府應該要向市民多解釋，而唔係凶神惡煞、義正辭嚴咁去處理，形容政府嘅語調係非常「趕客」，隨時因為咁嚇走本來想捐贈器官嘅人。

促多解說免人人自危

另外，對於李家超噚日提到要嚴厲處理濫用兩蚊乘車優惠嘅情况，羅健熙就認為政府應該講清楚所謂嘅濫用係邊類人，事關本身政策就有矛盾，長者可以兩蚊搭車，見車就上係好合理。佢自揭話學生年代因為爸爸係巴士司機，所以自己搭巴士免費，當時亦會為咗盡量減少等車時間而見車就上，認為類似嘅情况唔算濫用，而係善用，如果政府意指呢種行為係濫用，係非常錯誤，完全失焦。佢建議政府唔可以成日用負面字眼，應該要有清晰說法，同埋多解說，避免搞到社會上人人自危，擔心政府會對自己不利。