【Emily】612基金律師涉專業失當 「兩會」話仲查緊

【明報專訊】警方國安處舊年5月調查612人道支援基金期間，話留意到有律師同大律師涉嫌有專業失當行為，轉介兩個會跟進。事隔一年，律師會會長陳澤銘（CM）噚日見傳媒時話調查未完，唔方便透露詳情，重申調查保密，目前唔會對外公布涉事者身分。佢解釋，因為聽取被投訴人解釋同文件來往需要唔少時間，會盡快處理投訴。

大律師公會主席杜淦堃亦同Emily講仍然處理緊呢件事，會盡快完成。

律師會噚日舉行換屆後首次理事會會議，連任會長嘅CM話新一屆20人理事會入面女性增至7個，佔整體35%，形容發展令人欣喜，反映律師會多元，當然仲有女律師喺行內地位愈來愈重要。佢又再次逐一感謝離任理事，包括幾個被外界視為「開明派」嘅理事。

CM話過去幾年理事會選舉比較激烈，而律師會係反映社會，認為唔同意見係正常，對多人參選感到開心同鼓勵。佢話今次新當選嘅理事有唔同背景，認為係更多元、更有代表性。