【Emily】校隊二擇一 少年楊潤雄取籃球捨綠茵

【明報專訊】文體旅局長楊潤雄主理體育事務，平時成日見佢去文體活動做主禮嘉賓，但佢斯斯文文，無點見過佢落場。民建聯立法會議員鄭泳舜噚日「兼職」做港台體育節目主持，就搵局長訪問，楊潤雄就講自己讀書時都積極玩體育，仲話自己中學時係籃球校隊隊員，有代表過學校對外作賽。

細個喺屋企對住大門打乒乓波

楊潤雄係九龍華仁舊生，係特首李家超嘅師弟。楊潤雄喺訪問中提及，當年要喺入足球與籃球校隊之間做抉擇，話自己較鍾意打籃球，喺學校落場踢波時會被安排守龍門，而佢最後都係選擇加入籃球校隊，但依然鍾意睇足球比賽。楊潤雄係屋邨仔，話細個時就喺石枱打乒乓球，喺屋企就對住大門打。佢嘅年代會喺室外打羽毛球，但要睇下會唔會受大風影響。

講到未來體育大事，楊潤雄話2025年全運會會喺香港舉行部分項目，大家關心作為主場館嘅啟德體育園施工進度，佢話體育園全速興建，預料今年底起好一個場館，已可做測試，另兩個場館工程如果順利，都好有信心喺明年完工。

另外，楊潤雄噚日朝早出席四川形象推介會，提及今年香港會舉行「中國戲曲節」，四川省川劇院將演出《白蛇傳》等多齣折子戲。