【Emily】睽違十載 黃鴨長高打孖歸來

【明報專訊】闊別10年，由荷蘭藝術家霍夫曼（Florentijn Hofman）創作嘅巨型橡皮鴨再一次嚟到香港，噚日喺青衣一帶現身，Emily發現，今次仲多咗隻一模一樣嘅橡皮鴨「打孖」出現，而且身高18米，仲比以前高。

橡皮鴨2007年起游走世界各地，2013年來港。睇番當年報道，高16.5米嘅橡皮鴨喺尖沙嘴海港城一帶停泊咗50日，大批市民去尖沙嘴碼頭附近一睹風采同打卡。Emily記得當年展覽期間發生過小插曲，橡皮鴨一度變「泄氣鴨」，事關當時主辦單位喺展覽期間發現，連接橡皮鴨同浮牀之間嘅繩索有損毁，為安全着想就暫停展覽修補，之後先再恢復展覽。

今年適逢係橡皮鴨訪港10年，嚟緊將會再有海上公共藝術展覽「橡皮鴨二重暢」，橡皮鴨會連埋同伴一齊出現，但詳情就要等下月1日正式公布，主辦單位希望可愛嘅橡皮鴨可以散發藝術嘅治癒力量，溫暖人心，帶嚟更多歡樂。