【Emily】田叔叔見小讀者 「熱情粉絲」攬又錫

【明報專訊】為培養小朋友對英文閱讀嘅興趣，實政圓桌立法會議員田北辰（田叔叔）幾年前成立「田叔叔英語閱讀計劃」，向小朋友派發英文故事書及點讀筆，希望令佢哋學好英文。適逢最近亞博舉行兒童書展，田叔叔特登去咗同一班小讀者見面，仲話被「熱情粉絲」又攬又錫。

話要小朋友媽媽「強拆」先講拜拜

田叔叔噚日同一班小讀者見面、合照，然後整襟章送畀佢哋。另外佢話只要係小朋友要求，自己就會做足fan service（粉絲服務）派福利，又攬又錫咁，仲形容有粉絲黐住佢嘅程度勁過磁石襟章，最尾要小朋友媽媽「強行拆散」先講拜拜。佢事後話每次同小讀者見面、簽書都好開心，因為對方會嗌佢喺書中嘅兩個角色名「Mr. Sun」、「田叔叔」，而熱情粉絲係支持佢呢個計劃嘅動力。田叔叔並透露最近改編緊小一嘅書，仲借鏡咗《安徒生童話》嘅故事，講狐狸同母雞發生咗啲爭執，Emily相信一眾小讀者會好期待喇。