【Emily】家訪sell區會改制 現時有啲區議員 曾國衞批「搞搞震」

【明報專訊】政府今個月內向立法會提交區議會改革嘅修例草案首讀，民青局長麥美娟（圖右）、政制局長曾國衞（圖左）日前一齊到筲箕灣耀東邨家訪，宣傳新方案，並拍成片段。片中兩人訪問兩戶，其中有兩名婦女上鏡，有人批評現屆區議員幫唔到居民，只見過區議員3次。兩局長就一唱一和，曾局長話現時有啲選出嚟嘅區議員都係「搞搞震」，所以改制就會好。

喺政府發放嘅片段，居民林女士認為今屆區議會幫唔到街坊，上任以來只見過區議員3次，「都見唔到人影，做咩區議員」。另一居民吳太（圖中）就話希望新區議會唔好咁亂，「我有兩個小朋友返緊學，所以想安安穩穩喺社區長大」。

曾國衞話，有啲區議員「搞搞震」，所以政府千方百計想搵好嘅區議員，做好地區工作，話將來「四圍都有區議員」。麥美娟就話新方案會設履職監察機制，確保區議員唔會「選咗出嚟又唔開會、又唔見人、辦事處又唔開門」。