小紅書網民挑釁空姐帖 葉劉話過火 新書引述港人英語退步 「有無反省自身水平？」

【明報專訊】國泰空姐被指「歧視」風波掀起社會廣泛討論，行政會議召集人、新民黨主席葉劉淑儀（圖）噚日喺社交媒體提到，網上流傳有小紅書網民發帖話會帶隨身隱形攝錄裝置，故意挑釁空姐等非理性帖文，葉太認為呢啲都「過火」咗。葉太認為，香港人唔應該歧視內地人，內地人亦唔應該對香港人抱有過激同過度情緒化嘅反應，否則只會加深兩地矛盾。

話有內地網民或唔了解港特質

葉太話，或者部分內地網民唔了解香港社會嘅獨特性質，指香港講普通話嘅人愈來愈多，但並未如內地普及。另外，佢認為，作為一個服務員嘲笑顧客來源地、膚色或語言都係歧視，而作為專業服務員更應尊重客人、以禮待人。

原來葉太即將出新書Learning English from Regina，佢引述為其新書寫序文嘅《華盛頓郵報》前記者、香港外國記者會主席瑞凱德（Keith Richburg）話，發覺近年香港人英語水平倒退咗，一啲英語文法如過去式同現在式都搞唔清，分不開眾數、單數，動詞、被動詞都唔識寫等。葉太反問，假如香港人嘲笑個別人士英文發音或文法有誤，又有無反省自身英語水平？