撐區選方案 聯盟稱蒐161萬簽名

【明報專訊】政府早前提出區議會改革方案，將會提交立法會審議，不過翻查立法會日誌，距離立法會暑假休會只有6次會議，到底可唔可以順利審議呢？立法會內會主席李慧琼噚日就話，立法會喺審議具迫切性法案方面有經驗，相信議員都清楚，區議會將於年底換屆，議案有迫切性，而且立法會之前已成立一個委員會專門準備審議方案，預計法案喺立法會首讀後，委員會變成法案委員會，會盡快展開相關工作。

陳國基話反映社會殷切期望

「香港各界撐完善地區治理大聯盟」近期喺全港多個地方設街站蒐集簽名，噚日向政府遞交話有超過161萬個簽名，有110萬個喺街站蒐集到、51萬個喺網上蒐集。政務司長陳國基、民政及青年事務局長麥美娟有份接收簽名，陳國基致辭提到，方案推出後，唔止官員做游說、解說工作，亦有多個愛國愛港團體無懼風雨設街站，同埋喺網上蒐集簽名爭取支持，蒐集到嘅簽名反映社會有殷切期望，感謝大聯盟嘅努力，希望方案能夠喺立法會休會前三讀通過。

作為大聯盟總召集人嘅李慧琼話，逾160萬名市民簽名係反映香港社會非常期待改革方案，期待防止失效崩壞嘅區議會，要做好本職工作，亦清楚顯示方案符合市民期望，認為應盡快落實方案。