【Emily】97％港人擁智能手機 比率10年升一倍

【明報專訊】喺智能手機普及嘅年代，租用場地、網上購物都可以透過一部智能手機搞掂。政府統計處喺上年6至9月做咗一個主題性住戶統計調查，發現有超過623萬個10歲及以上嘅人擁有智能手機，佔比達97.1%，而喺2012年，年滿10歲擁有智能手機嘅比率係54%，10年之間比率升近一倍。

統計處話智能手機滲透率嘅增幅喺長者中特別明顯，舊年有90.7%嘅年滿65歲者擁有智能手機，較2020年68.1%高咗逾20個百分點，同期整體升幅係5個百分點；不過其他年齡組別喺2020年調查嘅相關佔比都已超過九成。

老友記疫下升幅顯著

調查亦發現，年滿15歲者有約286萬人喺統計前12個月內，曾為個人事務而喺網上購物，佔全港所有年滿15歲者嘅46.8%；喺2020年做嘅類似調查就發現有43.1%。

六成試過流動支付

另一項發現係，有近369萬個年滿15歲嘅人喺統計前12個月內，曾經用過流動支付，佔全港年滿15歲者嘅60.2%，當中最常使用流動支付嘅事項係「實體店舖內付款」，有77.4%，其次分別係「網上購物」（76.4%）同埋「轉帳給親友」（70.8%）。