【Emily】國情研習班復辦 首長級23人赴京

【明報專訊】政府最近恢復公務員嘅國家事務研習課程，最新一批23個首長級公務員日內出發上京，參加為期7日嘅課程，之後再轉去上海。今次嘅團長同副團長分別係通訊辦通訊事務總監梁仲賢同警務處副處長（管理）周一鳴。

公務員事務局長楊何蓓茵噚日去見一班學員，之後喺facebook話當年，10年前佢以團長身分參加研習課程，講者將國家發展同策略深入淺出咁闡述，令佢獲益良多，希望今批學員可以透過同講者積極交流，深入了解國情。

2015年參加過研習班嘅團長梁仲賢就話，當年對內地講者提到依法治國、文物保育、「一帶一路」倡議等議題印象深刻，期望今次學員可以投入參與，盡情交流，之後可以做好朋友，將來涉及跨部門工作時，透過電話或短訊聯繫就可以迅速解決難題。