【Emily】連日炙熱 卿姐函懲教署倡加風扇 署方話一直有多項降溫措施

【明報專訊】近期陽光猛烈，天文台連日發出酷熱天氣警告。本身係太平紳士嘅民主黨前主席劉慧卿前晚就發電郵畀懲教署長黃國興，建議署方喺院所加裝風扇等裝置，改善囚室通風，畀在囚者喺酷熱環境下都有適切嘅保障。

卿姐話接到市民求助，話好憂慮在囚者喺酷熱天氣下嘅狀况。卿姐建議獄中加風扇、頂樓灑水系統，喺飯堂加抽風扇等，同埋盡可能畀囚友喺工作之後可以冲多一次涼降溫。

關注囚友嘅立法會前議員邵家臻就話，炎夏時監獄中「活得像蒸籠裏的小籠包」，多謝卿姐以太平紳士身分為囚友出聲，希望封信能得到懲教署長積極回應。

懲教署回應話一直採取多項措施改善獄中環境，今年2月委託咗建築署喺個別院所建築物上蓋塗上隔熱漆，測試降溫效能，有關測試會擴展至其他院所。

署方又話，院所有加裝風力強勁嘅牛角扇，並逐步安裝新式閘門同窗，改善空氣流通，另外又喺唔同院所超過1600個囚室加裝咗防自殺設計嘅滾筒扇。