【Emily】曹星如洪嘉豪 勞處招聘會講talk

【明報專訊】為咗配合青年嘅職前培訓同就業需要，勞工處聽日（6月1日）舉辦「青年搵工日@展翅青見計劃」，適合15至24歲副學位或以下學歷同埋無相關工作經驗嘅離校青年參加，仲邀請到拳擊運動員「神奇小子」曹星如分享點樣喺運動路上突破自己，另外有歌手洪嘉豪分享演藝事業嘅奮鬥經歷。分享環節座位有限，先到先得。

聽日修頓搞 逾2000職缺

招聘會當日上晝11點至下晝6點喺灣仔修頓室內場館舉行，有30間公司參與，提供超過2000個全職同兼職在職培訓職位空缺，仲會提供即場招聘同面試。

根據參與名單，到場招聘嘅涵蓋運輸、酒店、銀行、主題公園、公用事業、零售、餐飲、物業管理等範疇嘅僱主，包括海洋公園、港鐵、九巴、四季酒店、文華東方酒店、惠康等。