【Emily】15cm風扇仔 vs. 31.2℃室溫 新冠剛癒林超英瞓得着

【明報專訊】颱風瑪娃嘅外圍下沉氣流為廣東帶來極端酷熱天氣，天文台噚日下晝錄得34.7℃，為今年以來最高紀錄。一直身體力行節能減碳嘅天文台前台長林超英前晚同噚日分別喺facebook發文，分享佢喺30幾度嘅室溫下仍然唔開冷氣，只靠一把15厘米直徑嘅金屬製USB風扇降溫。帖文一出，唔少網民回應，有人話每個人體質不同，曾經有人在家熱死，另有網民質疑林在家偷偷開冷氣，不過都有唔少網民表示支持同佩服。

林超英回覆Emily，話佢上周中咗新冠，已經好番，又話前晚室內氣溫32.2℃，相對濕度76%，開咗USB風扇之後，風速每秒0.4米，雖然係熱，但又未至於頂唔順；至於噚日下晝溫度係31.2℃，相對濕度82%，佢話早上做咗運動，有啲攰，午睡瞓得着，都係全靠掛喺蚊帳頂嘅USB風扇，送來溫柔氣流。

非死硬派 話「頂唔順」會開冷氣

對於有網民擔心佢中暑，林超英話唔使擔心，佢唔係死硬派，頂唔順係會開冷氣嘅，不過目前未有需要。Emily追問去到幾多度佢先會開冷氣？林超英都係答「頂唔順」時。