【Emily】話招商未必要設經貿辦 林健鋒倡喺使館「設櫃枱」

【明報專訊】經民聯立法會（商界一）議員林健鋒（Jeffrey）早前與商界共同成立「香港大使會」，佢透露將於6月中率團出訪阿聯酋首都阿布扎比及迪拜，與當地官員及商界會面。今屆政府銳意推動與中東、「一帶一路」國家發展，Jeffrey認為政府應該增設辦公室招商引資，仲話唔一定要設立經貿辦，獻計可以喺各地中國大使館設櫃枱。

Jeffrey話今次出訪阿聯酋行程預計5日，團員包括建築規劃、環保、創科界人士等，將與當地負責財金、經濟、旅遊嘅官員會面，期望促進兩地商界雙向投資以及當地家族辦公室來港。佢提到，當地商界知道香港發展北部都會區同交椅洲人工島，但唔了解詳情，此行會推廣本港新發展計劃，期望吸引資金投資香港基建，甚至來港發展。