經濟
港燈45年老臣子尹志田7月退休
【明報專訊】長江基建（1038）、電能實業（0006）及港燈投資（2638）罕見同日宣布董事局人事變動。服務電能同港燈嘅老臣子尹志田將於7月1日退休，辭任電能執董職務同時，喺港燈懸空嘅行政總裁職務，將由執行董事鄭祖瀛接手。港燈亦同時委任工程建設科總經理關應良做執行董事同可持續發展委員會成員。
尹志田早於電能嘅前身港燈集團時入職，時為1978年，不經不覺見證咗電能同港燈兩間公司嘅45年發展。佢任內親歷港燈集團由英資怡和系轉手到李嘉誠為首嘅和黃。喺和黃治下，佢又見證港燈集團將非電力生意組成嘉宏國際上市、八七世紀大供股兼之後私有化、豐澤電器轉入和黃、港燈集團改名做電能進軍國際，再分拆港燈上市，鋪鋪都大刁，咪話唔嘢少。尹老準備退休，小琴當然在此要順祝佢生活如意。
長和另一老臣子周太周胡慕芳，亦會於7月1日起辭任長建副主席、港燈主席霍建寧嘅替任董事。至於將來邊個係霍老嘅替任，大家仲估緊。周太本身來頭唔少，曾為香港主要律師行胡關李羅律師行之合伙人同律師，並長期喺長和、長建工作，資歷深厚。
email: [email protected]
