【Emily】巧手復修許冠傑戰衣哥哥高跟鞋 舊物光華重現

【明報專訊】政府新聞網噚日介紹文物保存工作，讚賞工作人員「妙手慎思 還原歷史」，話文物抵達各博物館時，會先送到博物館嘅有機文物修復室接受「身體檢查」，展出期間如有損毁，亦須送返修復室緊急處理，話一件件經典藏品能夠讓觀眾彷彿穿越時空，近距離感受本港流行文化嘅魅力，背後全靠一雙雙巧手修復。

康文署一級助理館長（文物修復）張婉娟係其中一雙巧手，佢加入文物修復辦事處20多年，主要負責紡織品修復，曾花個多月修復許冠傑喺演唱會上穿著嘅服飾。佢話服飾借到博物館時好多珠片嘅縫線鬆脫，要用線加固。

亞加力膠條支撐鞋帶 魚絲加固

另一文物修復人員、康文署二級助理館長（文物修復）李翠瑩專門修復有機類文物，包括張國榮於「跨越97演唱會」著過嘅高跟鞋。佢話高跟鞋曾存放鞋盒內，被壓過，因此鞋帶已垂落嚟，展出時為要呈現當時穿著嘅效果，所以要用亞加力膠條支撐鞋帶，再以魚絲加固。

康文署話，政府喺2022/23年度預算案撥款3700萬元，喺6個年度內為康文署和故宮文化博物館嘅文物修復人員提供專業培訓，包括各類文物修護理論、文物保存理論等。