【Emily】G19澳門考察 獲賀一誠接見

【明報專訊】繼粵港澳大灣區考察團後，有立法會議員最近去咗澳門考察。G19嘅15名議員去咗濠江兩日，噚日結束訪問，其間獲澳門特首賀一誠接見，仲拜訪咗多個部門，前日去咗澳門立法會，同賀會面期間就如何加強港澳立法機關、其他方面合作，推進兩個特區同埋大灣區嘅高質量發展交換意見，及加深雙方認識和協作；訪問團之後去埋金融管理局、衛生局，以及參觀經濟房屋、長者公寓等。G19召集人謝偉銓話，香港同澳門係兄弟城市，希望未來兩地嘅立法機關、議員可以加強交流合作。

G19議員噚日到路氹地區，參觀金光大道，去咗考察銀河國際會議中心展覽館同埋綜藝館嘅多項會展、演藝設施，了解澳門點樣借助博彩娛樂及旅遊事業嘅傳統優勢，加快推進經濟及多元化發展；最後一站到澳門科技大學，參觀中藥質量研究國家重點實驗室，了解最新發展及中醫藥研發成果。佢哋形容考察成果豐碩，可以深入了解澳門近年積極推進嘅「1+4」多元發展策略及舉措。