經濟
啟德零售館明年落成 專業教練教授奧運項目
【明報專訊】等咗好耐嘅啟德體育園終於有新消息，除咗運動場館之外，由新世界發展（0017）旗下K11集團負責租務代理及營運嘅「啟德零售館」，最新公布預計最快可以喺2024年下旬落成，佔地超過70萬方呎，即係仲大過apm。零售館將由700米體育大道連接去園區，而啟德體育園主要設施預計可以分階段喺2024年底前竣工。
話明啟德體育園，連商場都要有體育元素，「啟德零售館」主建築共有3座，每座最多樓高5層，加埋會有超過200間零售及餐飲店舖，當中運動購物同遊樂體驗店舖佔三分之一，館內亦設有運動學院，由專業運動員教練教授奧運運動項目，係全港最多專業運動員教練集中地及奧運項目運動學院。
已經公布入駐啟德零售館嘅品牌包括adidas、Decathlon、National Geographic apparel等，仲有遊戲機中心NAMCO將會進駐，為顧客提供安心、安全嘅遊樂空間。餐飲包括超過70間餐廳，例如拉麵「麵鮮醬油房周月」九龍首店、全新日本天婦羅丼品牌「魚天」 、戶外寵物餐廳等，AEON STYLE亦會進駐，真係包羅萬有。
