【Emily】紀律部隊中國女排過招 首長齊玩「人浪」打氣

【明報專訊】中國女排打完世界女排聯賽香港站後，繼續留港多幾日，噚日就同香港紀律部隊人員組成嘅排球隊切磋，警方、海關、懲教等都有派代表出賽。副保安局長卓孝業、警務處長蕭澤頤、入境處長區嘉宏、消防處長楊恩健、海關副關長陳子達同懲教署長黃國興就充當「啦啦隊」，仲齊齊玩「人浪」。最後中國隊以15比6、15比8連贏兩場勝出。

前港青女排手感榮幸

做警員延續團隊精神

成功喺場上擋咗幾次中國女排殺波嘅警隊代表周彥琳，曾經係香港女子青年排球代表隊成員。佢同Emily講話，11年前已經喺亞洲女子排球錦標賽同過中國女排隊長袁心玥一較高下，兩次都輸咗，不過佢覺得可以同國家隊切磋好榮幸。由運動員「轉跑道」到做警員，彥琳話運動係加入警隊嘅契機，可以延用團隊精神同堅毅特質去服務市民。

周彥琳經「運動員招募計劃」加入警隊，該計劃喺2021年7月推出，至今收到104名運動員申請，當中85人曾投考警隊，包括見習督察、警員及輔警職位。