【Emily】父親節收禮物 李家超獲囝囝「撐腰」

【明報專訊】噚日父親節，唔少政界人物喺facebook分享點樣慶祝。Emily節錄咗部分，先講育有兩子嘅特首李家超，佢收到護脊座墊，囝囝話希望呢個「貼身」座墊令佢工作時可以保持健康，「並時刻感受到家人在背後默默支持我，為我『撐腰』」；佢形容呢份禮物唔止貼身，仲好貼心，話上任呢一年同家人相處時間少咗，好多謝屋企人支持體諒。特首噚日出席創科展頒獎禮時，仲收到兩名學生親手畫嘅心意卡?。

田北辰一拖九遊大棠「甜到漏」

做咗公公嘅立法會議員田北辰噚日就一拖九，與囡囡、女婿同外孫去元朗大棠生態園，摘完生果仲有外孫餵食，佢話「甜到漏」。

喺大家都打卡打得好開心之際，有政界爸爸就冇得慶祝，好似立法會議員張欣宇，佢嘅仔女趁父親節預先喺屋企佈置好，掛咗「Happy Father’s Day（父親節快樂）」嘅氣球，不過張欣宇咁啱要離港工作，佢都話見到仔女精心佈置，心底都有啲唔情願要去外訪。Emily見到啲佈置相，相信張欣宇返港後，仔女會同佢補祝嘅。