【Emily】一門四護士 守護神爸爸：唔識煲湯 做囡囡心靈雞湯

【明報專訊】唔少市民趁父親節一家外出食飯、睇黃鴨共享天倫，不過屯門醫院病房經理張京雄一家四口就要提早一個禮拜慶祝，原因係張sir、太太同兩個女都係公立醫院護士，噚日要繼續緊守崗位。醫管局facebook噚日分享咗張氏一家嘅故事，大女張凱晴Christy憶述當年考實習試時，爸爸一直喺護士站徘徊，望住閉路電視睇實考試情况，仲緊張過囡囡。妹妹張曉晴Hilda就話，初入職有任何困難，例如人際相處、應付突發情况等，返到屋企都會請教爸爸。

張sir習慣面對病人，但諗起Christy大約4至5歲第一次重感冒，發燒嘔吐，佢全晚不眠不休喺身邊照顧，做爸爸嘅一樣感到緊張無力。兩姊妹喺護士家庭成長，大個亦加入護士行列，兩人現時喺博愛醫院工作，張sir嘅守護從細細個嘅牀邊，去到兩個女投身職場，一直冇離開過，成為佢哋嘅照明燈。

話程序電子化 要阿女教番自己

不過，張sir話?家時代唔同，佢嘅睇法唔一定啱，又話醫院好多程序已經電子化，要由阿女教番自己，但無論如何，佢話自己雖然唔識煲湯，但係會繼續做囡囡嘅最大後盾同心靈雞湯。