【Emily】周小松楊永杰「同框」論輸勞擔憂

【明報專訊】政府早前公布輸入外地勞工計劃，容許26個低技術工種輸入外勞，但被批「先公布，後諮詢」而搞到勞顧會好不滿。港九勞工社團聯會秘書長、立法會勞工界議員周小松喺另一議員楊永杰嘅網台節目《杰論分析》，再提政府繞過勞顧會係欠尊重嘅表現。周小松仲話，呢啲職位入行門檻低，容易被外勞取替，政府又無列出供求數字同人工水平等等，無疑係衝擊本地基層市民嘅飯碗。

楊永杰都話，有基層市民擔心僱主會降低招聘條件，拉低本地人嘅人工水平。周小松就講勞工界一樣憂慮，覺得輸勞應謹慎處理，話長期輸入外勞一定會影響本港勞工市場發展，同時壓抑人工正常水平增長；僱主不單止要用工資中位數招聘外勞，亦應同樣人工聘請本地人，要求勞工處嚴格要求僱主跟從。周小松又話，政府唔可以「躺平」應對勞動缺口，靠輸入外勞嘅做法解決唔符合市民期望。