經濟
領展黃大仙中心搞全球漢服模特大賽
【明報專訊】近期潮流興起著漢服，領展（0823）喺黃大仙中心商場，搞「我和漢服有個約會」主題活動，場內會舉辦盛夏漢服市集同一年一度嘅「禮衣華夏」全球漢服模特大賽。
今次喺香港賽區第二屆賽事，初賽會喺8月4日舉行，排名前列嘅選手仲有機會去內地參加總決賽。喺呢次領展大玩漢服風之餘，其實今年初黃大仙嗇色園已經舉辦漢服比賽，吸引咗唔少遊客注目。莫非各主辦單位看到黃大仙有變身做香港漢服中心的潛質？
今次領展大玩「漢服風」，亦不限於黃大仙中心，連帶佢哋喺深圳嘅領展中心城亦會喺7月8日同9日舉辦漢服市集及漢服巡遊。
而搞得漢服秀，除咗睇得之外，當然會有打卡區，仲有「漢服體驗館」免費租借漢服到打卡區拍照啦！深圳及本港兩個商場亦為旅客準備期間限定禮品同商戶優惠，香港呢邊就食正新一期消費券發放，不過玩得漢服，唔知大家使唔使畀漢朝嘅「五銖錢」先至可以找數呢？
