【Emily】親子華服寫書法 128隊齊創紀錄

【明報專訊】七一慶回歸活動未停，香港校董學會同觀塘民政事務處噚日合辦「親子華服好家風、書法齊創新紀錄」活動，仲邀請世界紀錄協會香港高級認證官吳華江，見證呢個「世界上最多親子組合身穿華服同時寫書法」嘅紀錄，出席嘅親子組合可獲證書。

Emily聽講今次活動籌備咗半年有多，所有服裝由夫子會負責，禮堂內全部人都著華服，場面壯觀。

活動有128隊親子組合參加，加埋嘉賓同活動幹事，全場300幾人一直等待緊創紀錄，司儀數「三、二、一」後，全場一齊開始寫「親子華服 良好家風 父慈子孝 兄友弟恭」，大人同小朋友都寫得好認真，有人寫完唔滿意再寫多張。警務處長蕭澤頤受邀參加活動，佢話希望各團體繼續為提高青少年國民身分認同一齊努力，將中華文化融入生活。