【Emily】36年官場感受 聶德權稱與抗疫有緣

【明報專訊】公務員事務局前局長聶德權喺「hpa何設計」季刊訪問，分享36年AO及問責官員生涯嘅感受，形容自己同抗疫結下不解緣。佢話，做緊公務員事務局長時，印象最深刻同最有挑戰性嘅係實行新冠疫苗接種計劃，因為由統籌到推行計劃都需要組織醫務、行政等好多單位，加上當時社會流傳好多「假信息」，所以當時必須積極宣傳推廣，令市民接受打新冠疫苗，最後高達90%市民都打咗針，形容有超強滿足感。

聶德權話，2003年做衛生福利局副秘書長時遇上SARS，佢有份安排淘大花園居民撤離到度假村；2006年被調派到食衛局做副秘書長時，完成第599章《預防及控制疾病條例》。

離開官場，聶德權現為港大政治與公共行政學系客席教授、恒生銀行（中國）獨立董事、宣明會中國董事等職位，指無論係全職、兼職、有薪定義務工作都唔緊要，認為最重要係搵到合適、感興趣同有意義嘅嘢去做。