【Emily】獄中炙熱 邵家臻嘆Gary Fan變咖喱炒飯

【明報專訊】近月本港天氣好熱，立法會前議員范國威（Gary Fan，綽號咖喱飯）正因民主派「35+初選案」還押，另一前議員邵家臻噚日去荔枝角收押所探佢。邵引述Gary話近排熱到夜晚返倉郁唔到，就好似蒸爐入面嘅小籠包，任何一個微小動作都會流汗，搞到佢睇唔到書、寫唔到信，做乜都冇心機，只能坐低或瞓低。

不過Gary話今年都比唔上舊年嘅「熱夜」，夜晚都超過30℃，形容「全晚石屎牆都燙手」。邵話心裏有個冷笑話，就係「咖喱飯（范國威）如今都變成咖喱炒飯了」。

同因初選案還押嘅鄒家成，其facebook專頁分享對歌手張敬軒《隱形遊樂場》嘅感受，話聽到歌詞不禁落淚，因歌詞令佢有感悟。佢話喺獄中反反覆覆度過一段段迷失嘅日子，最近喺混亂中梳理咗一啲想法，可以跟朋友分享。佢話學會知足與感恩，被捕兩年半，如果無家人朋友支持會孤單煎熬，而?家學懂不再埋怨。佢又話學會「忍辱」，未了解忍辱嘅價值之前，會認為忍辱只係無能力反抗時用作安慰自我嘅藉口，係懦夫作為，「但原來，當目標清晰，忍辱便是對抗逆境時的關鍵態度」。