【Emily】梁劉柔芬新書談及青年移民潮

【明報專訊】立法會前紡織及製衣界議員梁劉柔芬近日出新書《輕風柔語》，講吓個人成長，同埋同仔女相處嘅小故事。書中講到移民潮，梁太認為今次有唔少年輕人離開，可能係對香港一時感到灰心、有無力感，認為社會應該盡量理解佢哋。佢同時話，年輕人要明白改變唔容易，首先要凝聚社會共識，「政治便是妥協」，無人可以一錘定音。梁太打比喻，家中由父母話事，如果子女意見不被接納，也只好放下，唔好因此同家人鬧翻或感到沮喪。

梁太書中又呼籲年輕人擴闊視野、接受新思維衝擊，唔好只顧個人片面信念，不如將精力轉化能量，話唔定將來有更好發展。佢話，只要繼續堅信香港、各種制度更完善，相信走咗嘅年輕人他日回流後有好多機會發展。

翻看72家房客 話按原則過活最開心

梁劉柔芬同Emily講，2019年社會運動期間，都透過朋友嘅朋友，搵過年輕人喺自己寫字樓有幾次午夜對話，「畀個機會佢哋呻吓」，當時都學識唔去反駁，只係講吓大人嘅睇法。佢又感慨咁話，香港?家變得好冷漠，近日睇番經典作《72家房客》，話片中有權有勢嘅人做嘢有時會過咗界，無權無勢按自己原則做人，反而活得最開心。