【Emily】老翁出院去沙灘 謝職員拯溺之恩

【明報專訊】夏日炎炎，唔少市民都去海灘暢泳，本月10日七旬市民趙先生喺黃金泳灘遇溺，好彩獲救，港九拯溺員工會噚日喺facebook分享，話事主喺醫院觀察同休養後已康復出院，噚日去泳灘向沙灘同事道謝，並送上感謝信。

港九拯溺員工會喺帖文提到，話大家能夠見面都非常感恩，而當日有份參與拯救行動嘅工會副主席胡啟榮（圖右），仲送咗個游泳漂浮泡畀趙先生（圖左），用嚟祝福事主同朋友繼續安全咁游水同保持身體健康。Emily睇相片，見事主狀態唔錯，並同一眾沙灘職員影相留念。

根據工會喺facebook公開嘅感謝信，趙先生透露，自己當日因為身體不適回岸時發生意外，好彩當值救生員「英勇搶救」，令佢得以生還，話十分多謝各位。