【Emily】梁熙同警合作 每周發布東區騙案

【明報專訊】警方上年成立反詐騙協調中心，又設立熱線，但騙案總係時會發生。立法會港島東議員梁熙近日同東區警區合作，每周發放區內騙案情况，包括重點案件簡介、被騙最高金額、各騙案種類數目、受騙人所住地點等。好似喺過去一周，東區就發生咗最少49宗騙案，最高被騙金額1800萬元，亦有騙徒喺網上售賣聲稱迪士尼酒店或演唱會門票，收錢後唔見影。

梁熙同Emily講，資訊除透過網上發放、喺議辦公告板外，亦會擺街站派發同張貼喺部分屋苑大堂等，話發放騙案資訊係希望令區內居民更了解騙案手法，遇到騙徒可機警處理，避免損失，並期望警方將來可公布唔同地區嘅騙案情况。

不過，上個月梁熙喺立法會建議警方喺受騙者居所或工作地點張貼相關告示時，副保安局長卓孝業就形容建議「前衛」，會再研究吓，但憂慮咁做會對受騙者造成二次傷害。