【Emily】換心芷希快1歲 盧寵茂探望話欣慰

【明報專訊】BB女芷希上年12月接受內地心臟移植，轉眼間就快1歲生日。醫衛局喺facebook分享，局長盧寵茂噚日帶埋心意卡同小布書去兒童醫院探芷希，仲抱起佢影相，今次亦係芷希手術後第一次出現喺鏡頭前。醫衛局喺帖文話，芷希已經開始探索身邊事物，小手緊握一直陪伴佢嘅小小火雞公仔，仲識自己揭書。

醫衛局嘅帖文分享，芷希天真可愛嘅笑容融化身邊各人，就算面對房入面咁多陌生人都唔怕醜，當盧抱住佢嗰陣更眼仔碌碌同局長交流，咿咿呀呀咁學大人講嘢。盧寵茂話望住芷希成長感到欣慰，又多謝芷希父母送上心意卡。局長亦特別感謝醫護團隊，包括醫生、護士、物理治療師、營養師等盡心盡力照顧芷希，令佢穩步踏上復康路。局方亦講到，兩地正就恆常器官移植互助機制討論技術要求、準則同流程，期望今年內落實安排。