【Emily】連日批段崇智 CY「現身」中大活動 段校長「同場」

【明報專訊】改組中大校董會嘅條例草案掀起各界討論，而中大校長段崇智未有現身立法會中大草案會議。全國政協副主席、前特首梁振英（CY）連日喺社交媒體評論事件，如批評段崇智「失蹤」、重提「停用」段崇智嘅需要等。Emily發現二人噚日「同場」，CY參加中大主辦嘅「2023年大灣區科學論壇名師講堂」活動，不過CY係透過視像致辭，段崇智就親身出席活動。

灣區科學論壇活動視像致辭

活動喺廣州、香港兩地同步舉行，由大灣區科學論壇秘書處、中大、廣東省人力資源和社會保障廳共同舉辦，Emily睇過出席名單，發現除咗梁振英同段崇智，大灣區科學論壇主席白春禮都有致辭。其中梁振英提到推進大灣區粵港澳三地科技創新，培育人才、涵養人才、聚集人才係關鍵。中國工程院院士鍾南山、香港科學院院長盧煜明都有作主題分享。