【Emily】踏杭州亞運場地 議員興奮到跳起

【明報專訊】杭州亞運9月舉行，去咗杭州訪問嘅文化體育及旅遊局長楊潤雄，噚日同杭州市體育局長金承龍會面，又同杭州亞運會組委會工作交流，仲參觀咗杭州亞運村、杭州奧林匹克體育中心及黃龍體育中心。立法會民政及文化體育事務委員會成員亦去咗杭州考察，其中議員陸瀚民係facebook出帖，其中一張相片係佢同另外兩個議員喺黃龍體育中心跑道上跳起合照，又踩比賽場地嘅草地，睇嚟非常興奮！

中旅社將在港銷售門票

楊潤雄噚日發稿，形容今次訪問同交流有助香港參與舉辦2025年全國運動會，同埋善用即將落成嘅啟德體育園，進一步推動體育發展。立法會民政及文化體育事務委員會主席鄭泳舜話，佢訪問期間提出咗唔少市民、包括運動員家屬都想買飛去杭州現場觀賽，有關方面就答佢，話已委託中旅社盡快喺香港推出門票銷售。

陸瀚民話喺行程了解到，杭州羽毛球設備嘅製造係體育產業鏈一個關鍵角色，認為當地體育服務業、體育製造業、體育批發零售業和體育建築業值得香港借鏡。