【Emily】在職媽媽餵哺難 中醫：心境舒暢有幫助

【明報專訊】每年8月嘅第一個禮拜係「國際母乳哺育周」。浸大中醫藥學院臨牀部中醫臨牀教授張春玲話，發現餵母乳嘅在職媽媽面臨一啲困難，例如乳汁分泌不足、母乳堵塞引致乳房脹痛、出現「石頭胸」等情况，又話生完BB如果情緒低落，就可能堵塞乳絡，所以保持心境舒暢對餵哺會有幫助。佢又提醒媽媽如果工作非常辛勞，唔舒服嘅時候就唔好勉強餵母乳。

話太辛勞勿勉強餵母乳

張春玲話，媽媽生BB會消耗唔少血氣，而母乳都係由血氣轉化，假如媽媽脾胃虛弱，或者生BB嘅時候出血過多，都會令乳汁不足；而生完BB之後如果情緒低落，就可能堵塞乳絡，哺乳期媽媽除咗要補益氣血，都要避免受風寒同埋保持心境舒暢。

佢建議媽媽要避開一啲甜膩、辛辣嘅食物，寒涼嘅水果都唔好食咁多，而係飲吓啲健脾湯品，例如木瓜鯽魚湯、花生眉豆豬蹄湯。如果想補血，就可以飲五指毛桃煲雞湯。覺得腰痠骨痛嘅話，就飲淮山杞子蟲草花湯、杜仲核桃黑豆湯，喺湯水加少少通草，都有助暢通乳絡。另外，佢亦建議可交替按壓尾指嘅少澤穴，每日一至兩次，每次5分鐘，以改善血氣不足。