【Emily】潑水音樂節首來港 參加記住著泳衣

【明報專訊】中環海濱呢個周末會舉行S2O亞洲潑水音樂節，到時除咗可以一邊聽住外國同本地DJ打碟、一邊濕身跳舞之外，韓港台音樂單位YELLOW黃宣、per se、朱凌凌、JB x The Hertz等都會到場表演。不過場內唔收現金，只收電子支付，入場記得要帶防水袋裝好電話同貴重物品喇。

音樂節用到泰國空運來港嘅360度噴水系統，預計每日射出約20萬公升水，後台亦有水池儲水。潑水音樂節創辦人Pulin Milintachinda就話，潑水節係泰國傳統，知道香港人好鍾意泰國，希望今次音樂節可以「帶到少少泰國嚟香港」；又話今次係音樂節舉辦9年來首次喺香港舉辦，中環海濱呢個場地被唔同地標圍住「好特別」。

門票有分一日同兩日通行門票，價錢分別係1180同1980元，另外仲有可以有專屬入口、非濕水專區、儲物室、洗手間同紀念品嘅VIP飛，一日同兩日嘅價錢分別係2080同3380元。主辦單位就話已賣出九成嘅飛，預計會有「以萬計」嘅人入場。