【Emily】藝廊展品被指疑「偽鈔活動」 警到場查列「誤會」

【明報專訊】位於中環大館嘅藝廊Touch Gallery 8月舉行「為何寫實？」展覽，但藝廊前日喺facebook話日前有警員上門調查。原來事件係有人見疑即報，指一個以港幣為創作靈感嘅作品展懷疑係販賣偽鈔活動。藝廊話警員喺4號下午到場調查，「以為我們是偽鈔製造基地」。警方回覆Emily查詢話當日下晝約5點半接到市民報案，話喺大館有港幣畫作懷疑有問題，警員到場後發現係同港幣有關嘅藝術品，事件列「誤會」。

有關作品由藝術家麥頌恩（Grace）創作，佢畢業於中大經濟系，現讀緊中大藝術文學碩士一年級。睇番啲相，作品以鈔票為意念，其中一幅以500元為藍本，畫上「香港上海滙豐銀行有限公司」，不過「500」前後倒轉咗做「005」（匯控上市編號），並畫上「每股廿捌元」。

Touch Gallery話，Grace嘗試以經濟學角度出發，結合藝術嘅表達形式，探討社會同個人、理性同感性以及真實同虛假之間嘅衝突同融合；Grace希望透過呢個系列回應藝術同金錢間嘅關係，故揀咗港幣做題材。