【Emily】上周缺席立會 段崇智現身迎新生 講半個鐘中大歷史課外活動

【明報專訊】立法會早前審議香港中大校董會改組嘅私人條例草案，校長段崇智以接受醫療程序、按醫生建議休假為由，唔出席上周五（4日）嘅會議。事隔6日，段校長噚日現身出席中大迎新日，仲上台歡迎新生、介紹中大歷史同講吓中大有咩課外活動等，講咗大約半個鐘，似乎病情已經好番好多。睇翻資料，段校長去年無親身出席中大迎新日，只係透過錄影片段歡迎新生。

本報曾報道，上年中大迎新講座尾段增設「國家安全講座」，搵嚟時任公民教育委員會委員、現任立法會議員李浩然主講，有新生對安排感突兀，轉播廳內逾百個新生逾半喺演講中途走人。Emily噚日去咗新學年迎新日，活動朝早10點開始，約11點40分完結，新生迫爆邵逸夫堂主講廳，而轉播廳有逾200名新生，雖然噚日未見有國安講座環節，但大約11點15分，轉播廳有至少50名新生提早走人。

舊年增國安講座 今年未見

迎新日除咗段崇智上台介紹中大歷史外，中大常務副校長陳金樑、另一副校長汪寧笙（Nicholas Rawlins）、逸夫書院院長梁耀堅亦分別提醒學生全球視野嘅重要，同埋提醒要注意精神健康等。