【Emily】康署資助新興運動 健球總會辦體驗日

【明報專訊】唔少人鍾意打波，康文署推出新興體育活動資助先導計劃，資助本地體育機構推廣新興運動，香港健球總會運用資助舉辦免費健球體驗日，鼓勵市民參與。健球比賽選用直徑達1.22米嘅波，三隊同場競技，一隊接球失敗或犯規，其餘兩隊就得分。健球教練黃天倫話，運動員要採取唔同策略，憑力量、速度接球同進攻，令對手無法接球，四人一隊嘅作賽方式講求合作，仲要配合走位路線、運球位置。

匹克球就集羽毛球、網球和乒乓球技巧於一身。中國香港匹克球總會賽事總監何景財話，匹克球節奏可快可慢，適合唔同年齡嘅人包括輪椅人士。總會會用資助開辦匹克球基礎證書課程，畀市民體驗，亦會讓參加者嘗試坐喺輪椅打波，促進傷健共融。

年度資助21機構330活動

康文署康樂事務經理（體育資助）陳艷婷話，喺2023/24年度先導計劃向21間本地體育機構提供資助，舉辦約330個活動，預計逾1.2萬名市民參加，下年度先導計劃申請明年初展開。