【Emily】分一三五二四六 汽車限行陸頌雄倡仿內地

【明報專訊】工聯會立法會議員鄧家彪主持嘅網上節目《理中有我》最新一集請咗黨友陸頌雄做嘉賓，唔係傾勞工議題，係討論三隧分流等熱話。被問香港係咪應該學習內地私家車限行政策解決擠塞問題，陸頌雄建議學習內地分日數限制私家車使用，例如分周一三五、周二四六，當日市民可以選擇過海或唔過海，同時每年提供特定日數有特別機會可以過海，如遇緊急情况，就可能用特別徵費過海，同時堅持「效率優先，公交優先」過海原則。

被問點評價三隧分流措施成效，陸頌雄話「633」固定收費方案同「易通行」同步實施，目前交通變化唔大，而因為紅隧同西隧收費差距收窄，部分紅隧車流轉去西隧，令西隧車流變多，但可能正值暑假，部分人外遊，車流量唔多，所以未見三隧齊塞，相信政府下一步推進「644」方案後會見到較大實質效果。

熱愛揸車嘅陸頌雄澄清唔係每日返工都揸車，係個「策略性」駕駛愛好者，通常喺最繁忙時段如早上8至10點前，如果要返立法會都唔會揸車，因為會塞車，10點後就會考慮享受駕駛樂趣，假期亦會接載家人。