【Emily】20「狗醫生」下周六搭港鐵 宣傳動物輔助治療

【明報專訊】除咗導盲犬之外，其他動物平時唔可以喺港鐵入閘，不過今個月26號嘅「國際狗狗日」，港鐵將會畀20隻「狗醫生」搭車，希望提升市民對狗醫生動物輔助治療計劃嘅認識。

港鐵：可微笑支持勿亂摸

亞洲動物基金嘅狗醫生平時會定期探訪醫院、老人院、殘疾人中心、孤兒院同學校嘅弱勢社群，提供安慰同陪伴，至今已服務超過69萬人。喺26號當日，每隻狗醫生會由一個著紅色衫嘅義工帶領，狗狗會放喺身體部位唔會外露嘅專用袋或者背囊入面，而且淨係會用最尾一卡車廂。港鐵提醒，如果當日見到狗醫生，都唔好隨便摸佢哋，想表達支持嘅話，向義工報以微笑就足夠喇！

亞洲動物基金狗醫生項目經理邱瑪瑜希望今次同港鐵合作，可以令更多人認識狗醫生嘅貢獻，鼓勵大眾願意畀屋企嘅狗狗成為狗醫生，喺改善大眾心理健康方面出一分力。