【Emily】特首同歐盟使節午餐 帶埋負責經貿常秘

【明報專訊】政府官員喺新冠疫後多咗見不同界別人士，特首李家超上周同歐盟駐港使節都按慣例每半年共晉午餐。Emily留意到，除咗司局長，比較少有係多名常任秘書長都有出席，包括財庫局分管庫務同財經事務嘅甄美薇、朱曼鈴，商經局常秘利敏貞，引進重點企業辦公室主任容偉雄，以及工貿署長黃少珠等，某程度反映港府同歐盟交流嘅部署。

據Emily打聽，餐飯都順便歡送呢個月離任、到北京擔任瑞典駐華大使嘅瑞典駐港總領事歐思誠（Per Augustsson），交談中亦有歐洲使節問及《港區國安法》域外效力等問題。德國駐港總領事館喺社交平台提到，午餐會提供重要而有用嘅機會，就多個議題廣泛交流。歐盟駐港澳辦事處主任高宇馳亦喺社交平台話，高興同李家超及其團隊交流政治同經濟議題。除咗同歐盟外交官交流外，李家超近日都出席咗印度協會搞嘅印度國慶日酒會，同場仲有前特首梁振英。