【Emily】盈盈肚皮仍無消息 內地專家來港協助

【明報專訊】大熊貓盈盈同樂樂住喺海洋公園多年，唔少市民一直都期待佢哋可以誕下寶寶。Emily同事噚日去位於四川嘅中國大熊貓保護研究中心都江堰基地，知道原來基地月初已派咗專家去海洋公園協助繁殖事宜。海洋公園就回覆話，除咗都江堰基地，中國大熊貓保護研究中心雅安碧峰峽基地亦有派專家，兩位專家喺上周專程來港，協助公園本年度嘅大熊貓繁殖。

Emily同事噚日去到都江堰基地，見到唔少精靈活潑嘅熊貓，除咗瞓覺，仲見到部分未成年熊貓好活躍，周圍走來走去，又好享受咁食竹。當地專家分享，熊貓到6歲先算成年，當熊貓去到適婚年齡就會送去臥龍，因為嗰邊氣候同環境等更適合繁殖；至熊貓寶寶1歲幾，先會送返都江堰。

根據都江堰基地資料，原來熊貓繁殖受好多因素影響，包括環境、自身影響同伴侶選擇等。而都江堰基地同海洋公園一直保持密切嘅合作及交流，並喺每年熊貓配種嘅時候都派專家去香港；海洋公園亦會派飼養員去四川交流同學習。

海洋公園又話，盈盈同樂樂喺3月自然交配，公園獸醫團隊亦為盈盈人工授精，不過經評估後，已經確定盈盈今年唔會帶來熊貓寶寶。