大熊貓盈盈同樂樂住喺海洋公園多年，唔少市民一直都期待佢哋可以誕下寶寶。四川嘅中國大熊貓保護研究中心都江堰基地，月初亦已派專家去海洋公園協助繁殖事宜。海洋公園今（17日）回覆，除咗都江堰基地，中國大熊貓保護研究中心雅安碧峰峽基地亦有派專家，兩位專家喺上周專程來港，協助公園本年度嘅大熊貓繁殖。
都江堰基地有唔少精靈活潑嘅熊貓（見圖），除咗瞓覺，仲見到部分未成年熊貓好活躍，周圍走來走去，又好享受咁食竹。當地專家分享，熊貓到6歲先算成年，當熊貓去到適婚年齡就會送去臥龍，因為嗰邊氣候同環境等更適合繁殖；至熊貓寶寶1歲幾，先會送返都江堰。
