【Emily】後人贈畫像空運抵港 首任台長將回歸天文台

【明報專訊】天文台今年踏入140周年，前台長岑智明噚日（21日）喺facebook話，收到一份從丹麥哥本哈根空運抵港嘅大禮，原來係天文台首任台長威廉杜伯克（William Doberck；任期1883-1907年，小圖，天文台網頁圖片）嘅油畫肖像，由威廉杜伯克嘅曾侄孫米高杜伯克（Michael Doberck）送畀天文台。岑智明同Emily講，幅畫可以做天文台嘅生日禮物，佢亦已聯絡天文台，過幾日會親自送過去，不過仲要研究放喺邊度。

岑智明：可做天文台140歲生日禮物

岑智明話，之前機緣巧合見到港大一篇有關早期香港同華南氣象發展嘅文章，入面有幅畫嘅相片，之後經港大教授轉介聯絡米高，對方更主動提出將油畫送畀天文台，咁啱自己有朋友會去哥本哈根，所以託朋友拜訪米高，帶埋幅畫返港。

威廉杜伯克1873年於德國耶拿大學（University of Jena）獲天文學博士學位，香港天文台於1883年成立，威廉出任首任台長，佢仲制定咗一份氣象觀測指引，令天文台可以開展恒常地面氣象觀測。

岑智明話，幅畫由丹麥畫家Hans Christian Jensen喺1872年繪畫，當年威廉杜伯克只有20歲。