【Emily】邵家臻「一拳書館」分享會 警按舉報查牌

【明報專訊】早前出版《坐監情緒學》一書嘅立法會社福界前議員邵家臻同油尖旺前區議員朱江瑋，前日喺「一拳書館」搞新書分享會，其間有警員上門「查牌」。朱江瑋噚日喺社交平台講番事件，話前日書會途中，一隊「藍帽子」（機動部隊）上門表示接到舉報書店內有罪案，需要調查，抄低晒全場人嘅身分證資料後就離開。

朱江瑋引述，邵家臻同現場參加者講唔好意思，覺得係自己連累大家，而大部分參與者都係第一次被抄身分證；不過好多人都話報名參加活動時已有心理準備，亦有參與者分享話，無諗過去新書分享會都會被調查。

邵話珍惜微小 「搞個防自責會」

邵家臻亦喺社交平台提及事件，話警方行動歷時約30分鐘，事後大家繼續書會，不過焦點已轉咗。佢仲話，今次事件對於留港嘅人「大抵是一件小事」，不值一談，更加要做嘅應係珍惜每道微小，搞個「XXX防止自責會」，互相提醒不要自責。

至於提供場地嘅「一拳書館」就無特別提及事件，噚日喺社交平台只係話「雖然日常時有障礙，但一拳不會停步，繼續推廣閱讀和文化交流，請繼續支持我們」。