【Emily】反對日排核水 社團齊登報章廣告

【明報專訊】日本噚日將福島核污水排出海，自消息一出，中央及港府決定實施針對當地食品進口嘅禁令。香港唔同團體亦響應政府，對日本做法表達不滿，最近除咗有政治團體去日本駐港總領事館示威，噚日亦見政團及社團發動廣告攻勢，登報支持中央及港府嘅做法。

Emily留意到，呢批廣告大部分標明「強烈反對日本核污水排海」，又或者係「嚴正譴責日本轉嫁核污染風險」，部分又批評日方「一己私利凌駕全球福祉」、「極其自私自利不負責任」等，仲話「支持特區政府啟動進口管制措施」、「以保障香港的食物安全和市民健康」。全國政協常委、香港廣東社團總會主席龔俊龍同埋香港海南社團總會同樣都係刊登半版廣告，內文唔係剩係得大標題，仲有長文解說，從環境科學、經濟角度去解釋排核污水嘅影響，同埋解釋核污染係咩一回事。