經濟
柏傲莊撻訂戶佣金照付 施永青讚新世界重承諾
【明報專訊】近月新世界發展（0017）頻傳資金緊張，除咗多次高調澄清反駁負面消息，噚日連被內房拖佣十億人民幣嘅中原集團創辦人施永青都幫口！事關噚日施永青係專欄自爆，旗下經紀已經收到新世界當日因建築質素問題需要拆卸重建，而遭撻訂嘅柏傲莊三期「特別佣金」。
施老闆仲直接點名，連以往中國恒大（3333）、高銀與已故「舖王」波叔鄧成波嘅佣金，好多就算成交咗，但至今都未收到佣，認為新世界今次肯畀呢批佣金，顯示係一間重承諾嘅公司，亦顯見其債務問題並唔係好似外界所傳咁嚴重。
被內房拖佣拖到街知巷聞嘅施老闆今次自爆，猶如幫手新世界澄清。同行美聯亦唔執輸，美聯住宅部行政總裁（港澳）布少明都話，日前已收到新世界支付嘅柏傲莊III無完成成交單位嘅「特別佣金」。
布少明多謝新世界嘅爽快同慷慨，認為公司實踐當日承諾，係對一眾前線同事係項目銷售過程中努力嘅肯定，公司上下都感到高興同感激，亦證明新世界係一間負責任，而且財政穩健嘅公司，未來雙方會繼續衷誠合作。
