【Emily】十一煙花 香港電訊富衛人壽贊助

【明報專訊】特首李家超星期二（5日）公布今年10月1日會復辦國慶煙花匯演，當時佢未有透露會由邊一間機構贊助，答案噚日終於揭曉。政府發言人回應查詢話，今年嘅國慶煙花匯演將會由香港電訊有限公司同富衛人壽保險（百慕達）有限公司聯合贊助，10月1日夜晚9點喺維港舉行。

香港對上一次舉辦國慶煙花匯演已經係2018年，當年由信義玻璃贊助，用咗約1000萬元，由4艘躉船發放共31,888個煙花彈，共分8幕，歷時23分鐘。不過，後來分別因為反修例示威同埋新冠疫情，連續4年取消國慶煙花。

睇番資料，除咗上述4年，1997年回歸之後，2013年因悼念南丫海難嘅死難者，同埋2014年發生雨傘運動，國慶煙花匯演都曾經停辦。