經濟
醬香拿鐵賣斷市 瑞幸緊急採購茅台酒
【明報專訊】3年前因為帳目造假而畀美國證交會除牌嘅瑞幸咖啡，近年業務愈有起色，近日仲同貴州茅台（滬：600519）聯手推出、用厚奶同埋酒精濃度高達53度嘅貴州茅台酒整成嘅「醬香拿鐵」，受歡迎程度遠超預期，開賣唔夠一星期多間門市已賣到斷晒貨，話要同貴州茅台緊急入貨，入返啲53度嘅茅台烈酒。瑞幸話9月10日起部分城市門店會恢復供應，而9月19日起全國門店就會陸續恢復供應。
周一賣542萬杯 銷售額逾億
大家咪睇少呢杯賣38元（人民幣，下同）、酒精濃度其實只係介乎0.2度同0.3度之間嘅「醬香拿鐵」，喺星期一（4日）已經賣咗542萬杯，個銷售額已經逾1億元。之前有人實測連飲三杯「醬香拿鐵」之後接受酒精檢測，結果係檢測唔到有酒精。但係小琴都係勸喻大家飲完「醬香拿鐵」之後，都係千祈唔好揸車喇。
email: [email protected]
