【Emily】獲救女子熊抱消防 仰天笑哈哈

【明報專訊】世紀暴雨令多區嚴重水浸，唔少車都喺馬路中死火，搞到司機同乘客喺車上進退兩難，但亦有人「因禍得福」。事關噚日有電視台拍攝到一名被困車內嘅女子，被消防員抱起救出時，用樹熊姿勢攬到消防員實一實，仲全程展現燦爛笑容，事後有關片段喺網絡上瘋傳，引來網民熱議。

片段網絡瘋傳 有人問「消防係咪好靚仔？」

嗰位女子被救出時雙手環抱消防員嘅肩頸，仲將雙腳跨喺消防員腰上，成個人騰空，跨過石壆到隔籬行車線後，安全返到路上。由於該女子一直保持燦爛笑容，仲一度仰天大笑，呢一幕引起網民熱烈留言討論，有人笑稱「人生有幾多次可以咁樣抱住消防員？」、「個消防員係咪好靚仔？」等，仲話畫面「一定成潛力圖」。

有網民隨即「起底」該女子身分，話係曾經參與唔少電視節目嘅KOL鄭杞瑤（Kylie C），不過Kylie C事後透過IG限時動態否認係片中人，話「多謝大家關心，我一直在家休息，沒有被消防員哥哥救出喔～大家記得注意安全。」