【Emily】議員雨後紛落區 執葉剷泥通渠上門送水送暖

【明報專訊】本港連續兩星期經歷10號風球同埋超級暴雨，苦了唔少前線工友收拾「殘局」，多個立法會議員噚日都即刻落區，協助清理路面雜物，之後喺社交媒體同大家分享善行。新民黨李梓敬大約中午同團隊去到沙田圍，拉起褲腳澗水清理淤塞喺渠口嘅樹葉，清理兩個鐘後將一條「河」變番一條街。民建聯鄭泳舜就去咗深水埗一帶，剷走路面淤泥同執走塞住渠口嘅雜物等。

掃把斷埋就地取材 梁文廣發泡膠板剷泥

九龍西議員梁文廣都同團隊喺長沙灣一帶協助善後，見佢團隊成員用嚟清理嘅掃把都斷埋，梁文廣索性就地取材，拎住塊發泡膠板剷走馬路上嘅沙泥。

受山泥傾瀉波及嘅筲箕灣耀東邨停水兼扶手電梯故障，民建聯梁熙同團隊抬咗10箱樽裝水到位處山上嘅屋邨，同選委界議員管浩鳴一齊派畀邨內長者。劉國勳就去到臨時庇護中心慰問受雨災影響需暫避嘅人，協助派發飯盒、衣物、拖鞋等物資，仲帶咗2000多包保暖貼畀有需要嘅人保暖。

大雨將土瓜灣一間商舖內嘅夾公仔機都冲出行人路，工聯會黃國噚日就同團隊將部機同公仔搬番去商舖門口，唔好再阻塞行人路。